फोहोर र गुणस्तरहीन खानाको गुनासोपछि राजमार्गका २६ होटल स्तरीकरण

हलोखबर
२०८३ असोज ३० गते प्रकाशित

काठमाडौं, ३० असोज । सार्वजनिक यातायातमा यात्रा गर्ने यात्रुलाई खाना तथा खाजा खुवाउने राजमार्गका होटल तथा रेस्टुरेन्टमा सरसफाइको कमी, बासी खाना, झिँगा भन्किने, न्यून गुणस्तरको खाना र अत्यधिक मूल्य लिने गरेको गुनासोपछि २६ होटल तथा रेस्टुरेन्टको स्तरीकरण गरिएको छ ।

खाद्य प्रविधि तथा गुण नियन्त्रण विभागले चितवन र धादिङ जिल्लाका राजमार्ग क्षेत्रमा रहेका होटल तथा रेस्टुरेन्टको अनुगमन गरी स्तरीकरण गरेको हो । विभागले असोज २८ गते निरीक्षण टोली खटाएर होटल तथा रेस्टुरेन्टको अवस्था मूल्यांकन गरेको जनाएको छ ।

यात्रुबाट प्राप्त गुनासो सम्बोधन गर्न पूर्वाधार विकास मन्त्रालयमा सम्बन्धित निकायबीच छलफल भएको थियो । त्यसपछि यातायात व्यवस्था विभागले असोज २७ गते जारी गरेको सूचना कार्यान्वयन गर्ने क्रममा खाद्य प्रविधि तथा गुण नियन्त्रण विभागले अनुगमन गरेको हो ।

अनुगमनका क्रममा २६ होटल तथा रेस्टुरेन्टमध्ये १४ वटाले सन्तोषजनक स्तर प्राप्त गरेका छन् भने १२ वटा सामान्य स्तरमा वर्गीकृत भएका छन् । सन्तोषजनक स्तर प्राप्त गर्ने होटल तथा रेस्टुरेन्टले एक तारासहितको हरियो स्टिकर (सी) पाएका छन् । सामान्य स्तरमा वर्गीकृत होटल तथा रेस्टुरेन्टलाई पहेँलो स्टिकर (डी) दिइएको छ ।

विभागका अनुसार खाद्य स्वच्छताका आधारमा होटल तथा रेस्टुरेन्टलाई अति उत्तम (ए), उत्तम (बी), सन्तोषजनक (सी) र सामान्य (डी) गरी चार वर्गमा स्तरीकरण गरिन्छ ।

अनुगमनबाट सन्तोषजनक स्तर प्राप्त गरेका होटल तथा रेस्टुरेन्टमा समेत खाद्य स्वच्छता र सरसफाइलाई निरन्तर कायम राख्नु आवश्यक हुन्छ । यात्रुलाई सुरक्षित, स्वच्छ र गुणस्तरीय खाना उपलब्ध गराउने उद्देश्यले राजमार्गका होटल तथा रेस्टुरेन्टको अनुगमन र स्तरीकरण गरिएको हो ।