सिक्का हाल्नुस सस्तोमा ‘पधेँरो’को पानी पिउँनुस 

विदेशमा जस्तै ‘वाटर एटिएम’ नेपालमा

(No Comments)     October 12, 2018    

काठमाडौँ, २६ असोज । काठमाडौँ उपत्यका खानेपानी व्यवस्थापन बोर्डको सक्रियतामा नेपालमा पहिलो पटक ‘वाटर एटिएम’को नमूना सार्वजनिक गरिएको छ । 
 
वाटर एटिएम नमूना सार्वजनिक गर्न आज आयोजित कार्यक्रममा खानेपानीमन्त्री बीना मगरले उक्त एटिएमबाट पानी झारेर पिएकी थिइन । यस्तो प्रविधि नेपालमै पहिलो पटक सार्वजनिक भएको बोर्डका कार्यकारी निर्देशक डा सञ्जीव विक्रम राणाले जानकारी दिए ।   
 
ललितपुरको सैंबु, भैँसेपाटीस्थित बोर्डको परिसरमा वाटर एटिएमको नमूना प्रदर्शन गरिएको थियो । वाटर एटिएमलाई नेपालीमा पधेँरो नामकरण गरिएको छ । निश्चित पैसा तिरेपछि पानी पिउन पाइने अवधारणास्वरुप वाटर एटिएमको शुरुआत गरिएको हो । 
 
उक्त एटिएमबाट २०० मिलिलिटर र एक लिटर पानी पिउन पाइने व्यवस्था गरिएको छ । २०० मिलिलिटर पानीको मूल्य दुई रुपैयाँ र एक लिटर पानीको मूल्य १० रुपैयाँ राखिएको छ । 
 
उक्त एटिएममा दुई रुपैयाँको सिक्का हालेपछि पानी झर्ने व्यवस्था गरिएको छ भने छुट्टै एटिएम कार्ड प्रयोग गरेर पनि पानी पिउन पाइने व्यवस्था गरिएको छ । 
 
वाटर एटिएम पहिलो चरणमा ललितपुरको पाटन दरबार स्क्वायरमा राखिने र विस्तारै काठमाडौँ उपत्यकाभित्र विस्तार गर्दै लगिने बोर्डका कार्यकारी निर्देशक राणाले बताए । उनले काठमाडौँ उपत्यकामा मान्छेको चाप बढी भएको ठाउँहरुमा पहिलो चरणमा वाटर एटिएम राख्दै लगिने जानकारी दिए । चालू आवभित्र २० वटा वाटर एटिएम राखिने बोर्डको भनाइ छ ।

Comments

comments

Related Posts